Mae Credyd Cynhwysol yn eich cynnal os yw eich incwm yn isel neu os ydych yn ddi-waith. Mae’n daliad misol i helpu gyda’ch costau byw ac mae’n cynnwys elfen dai i dalu eich rhent.

Os ydych yn cael Credyd Cynhwysol neu ar fin gwneud cais amdano, dyma’r cyfan y mae angen i chi ei wybod am sut y mae’n gweithio gyda’ch tenantiaeth ateb.

Sut mae cyflwyno hawliad

Caiff hawliadau am Gredyd Cynhwysol eu cyflwyno ar-lein drwy wefan gov.uk.

Bydd angen y canlynol arnoch:

• Cyfeiriad ebost a rhif ffôn
• Cyfrif banc
• Manylion eich rhent a’ch tenantiaeth (gweler isod)

📌 Cofiwch: Bydd angen hefyd i chi gyflwyno hawliad ar wahân am Ostyngiad y Dreth Gyngor drwy eich awdurdod lleol.

Talu eich rhent ar Gredyd Cynhwysol

Pan fyddwch yn hawlio Credyd Cynhwysol, caiff eich costau o ran tai eu talu i chi yn hytrach nag yn uniongyrchol i ateb. Yna, rhaid i chi dalu eich rhent llawn i ateb bob mis ymlaen llaw, pan fyddwch wedi cael eich taliad.

Os ydych yn poeni am reoli hynny eich hun, gallwch ofyn am i’ch costau o ran tai gael eu talu’n uniongyrchol i ateb drwy Drefniant Talu Amgen. Gallech fod yn gymwys:

• Os oes gennych ôl-ddyledion rhent
• Os ydych yn agored i niwed mewn unrhyw ffordd neu os oes gennych anghenion cymhleth
• Os ydych yn cael trafferth rheoli arian.

Gallwch siarad â ni hefyd os ydych yn credu y gallai Trefniant Talu Amgen fod o help — rydym yma i’ch cynorthwyo.

Sut y gallwn eich cynorthwyo

Cydlynydd Lles Cymunedol

Gall ein tîm eich cynorthwyo drwy:

• Eich helpu i wneud cais am Gredyd Cynhwysol am y tro cyntaf
• Eich helpu i wneud cais am ragdaliad
• Rhoi benthyg dyfeisiau digidol i chi a’ch helpu i’w defnyddio
• Eich helpu i ddatrys problemau gyda’ch dyddlyfr Credyd Cynhwysol a gwneud cais i newid amserlenni talu er mwyn cael taliadau bob pythefnos.

Cydlynydd Tai

Gall eich Cydlynydd Tai:

• Eich helpu i ddeall sut y caiff eich rhent ei dalu dan Gredyd Cynhwysol
• Eich cynorthwyo i agor cyfrif banc
• Esbonio sut a phryd i dalu eich rhent
• Eich helpu i gasglu’r wybodaeth gywir am eich tenantiaeth
• Eich cyfeirio at gymorth pellach os oes angen.

📞 Cysylltwch â ni drwy ffonio 0800 854568 neu anfon ebost i [email protected]

Eich cyfrifoldebau chi

Wrth hawlio Credyd Cynhwysol, bydd angen i chi:

• Gyflwyno eich hawliad ar-lein (Dechrau hawliad)
• Talu eich rhent i ateb bob mis
• Sicrhau nad yw eich cyfrif rhent mewn dyled a bod y rhent yn cael ei dalu ymlaen llaw

Yn ogystal, bydd angen i chi ddarparu manylion cywir am eich tenantiaeth, gan gynnwys y wybodaeth ganlynol:

• Swm ac amlder eich rhent
• Dyddiad dechrau eich tenantiaeth, a thelerau eich tenantiaeth
• Cadarnhad eich bod yn byw yn eich cartref.

🧾 Gallwch ddod o hyd i’r wybodaeth honno yn eich llythyr blynyddol am rent neu drwy fewngofnodi i’ch cyfrif yn Fy Nghyfrif ateb.

Beth os ydych yn symud o fudd-daliadau etifeddol?

Erbyn diwedd mis Mawrth 2026, mae’r Adran Gwaith a Phensiynau yn bwriadu symud pawb sy’n cael:

• Cymhorthdal Incwm
• Lwfans Ceisio Gwaith yn seiliedig ar Incwm
• Budd-dal Tai
  …i Gredyd Cynhwysol.

Os byddwch yn cael hysbysiad trosglwyddo, bydd angen i chi gyflwyno hawliad am Gredyd Cynhwysol cyn pen 3 mis.

🔗 Ewch i’n tudalen ynghylch Symud i Gredyd Cynhwysol i gael y manylion llawn a chael cymorth.

Gwybodaeth bwysig arall

Taliad wedi’i reoli i landlord

Os yw cwsmer yn agored i niwed neu os oes ganddo 2 fis neu fwy o ôl-ddyledion rhent, gall ateb ofyn i’r Adran Gwaith a Phensiynau dalu’r costau o ran tai’n uniongyrchol i ni. Caiff hynny ei alw’n daliad wedi’i reoli i landlord. Gallwch gysylltu â ni i drafod hynny.

Cysylltu â’r Adran Gwaith a Phensiynau

Ni all landlordiaid siarad â’r Adran Gwaith a Phensiynau am eich hawliad am Gredyd Cynhwysol oni bai:

• Eich bod wedi rhoi caniatâd penodol i hynny ddigwydd, NEU
• Bod taliad wedi’i reoli ar waith yn barod.

Os ydych yn cael problemau gyda’ch dyddlyfr neu’n teimlo bod eich taliad Credyd Cynhwysol yn anghywir, bydd angen i chi gysylltu â’r Ganolfan Waith yn uniongyrchol.
🔗 Dod o hyd i’ch Canolfan Waith leol

Angen help?

Os oes angen cyngor neu gymorth arnoch:

• Siaradwch â’ch Cydlynydd Tai
• Ffoniwch ni ar 0800 854568
• Anfonwch ebost i [email protected]

Rydym yma i’ch helpu i dalu eich rhent yn brydlon a gwneud yn fawr o’ch Credyd Cynhwysol.