Croeso i’ch mannau a rennir

Dyma’r ardaloedd y gall pawb sy’n byw yn eich adeilad neu’ch cynllun eu defnyddio – er enghraifft, y cynteddau, y grisiau, y gerddi, y storfeydd biniau a’r lolfeydd.
Dyma rai atebion sydyn i gwestiynau cyffredin.

Defnyddio mannau a rennir

• A allaf ddefnyddio pob un o’r mannau a rennir?

  Gallwch! Gall y preswylwyr i gyd fwynhau unrhyw fannau sydd wedi’u nodi yn fannau cyffredin.

• A all y bobl sy’n ymweld â fi eu defnyddio hefyd?

  Gallant. Mae croeso i ymwelwyr, ond gwnewch yn siŵr eu bod yn dilyn yr un rheolau â’r preswylwyr.

• A oes yna adegau pan fydd rhai ardaloedd ar gau?

  Mae’n bosibl y bydd gan rai ardaloedd – er enghraifft lolfeydd, ystafelloedd golchi dillad neu ystafelloedd cyfarfod – amserau agor penodol. Fel rheol, bydd pob man arall ar agor drwy’r dydd.

Glanhau ac atgyweirio

• Pa mor aml y caiff ardaloedd cyffredin eu glanhau?

  Mae’r trefniadau glanhau’n dibynnu ar eich adeilad. Caiff cynteddau eu glanhau bob wythnos fel rheol, a chaiff gerddi eu cynnal a’u cadw drwy gydol y flwyddyn.

• Sut y gallaf roi gwybod bod rhywbeth wedi torri?

  Rhowch wybod i ni drwy ein sianelau cysylltu arferol – dros y ffôn, drwy ebost neu drwy’r porth ar-lein.

• Faint o amser y bydd yn ei gymryd i wneud y gwaith atgyweirio?

  Caiff problemau brys sylw yn sydyn. Mae’n bosibl y bydd angen ychydig yn rhagor o amser i gyflawni tasgau atgyweirio arferol, ond byddwn yn rhannu’r wybodaeth ddiweddaraf â chi’n gyson.

Diogelwch

• Pam na allaf adael eitemau yn y cynteddau?

  Diogelwch yw’r prif reswm. Gall pethau fel beiciau, pramiau neu esgidiau flocio llwybrau dianc ac achosi peryglon tân.

• Beth os byddaf yn sylwi ar broblem o ran diogelwch?

  Dylech roi gwybod i ni’n syth am bethau fel drysau tân sydd wedi’u difrodi, larymau diffygiol neu allanfeydd sydd wedi’u blocio.

• Pam y mae rhai drysau’n cau yn awtomatig neu’n aros ar glo?

  Mae hynny’n helpu i gadw pawb yn saff ac yn ddiogel ac yn atal tân neu fwg rhag ymledu.

• Beth os byddaf yn gweld rhywun nad wyf yn ei adnabod?

  Os ydych yn teimlo’n ddigon cysurus, gallwch ofyn yn gwrtais pwy y mae’n ymweld â nhw. Os nad ydych yn teimlo’n gysurus, rhowch wybod i ni.

Hygyrchedd

• Beth os wyf yn cael trafferth defnyddio ardal a rennir?

  Os ydych yn cael trafferth cyrraedd rhywle – oherwydd drws trwm neu risiau, er enghraifft – cysylltwch â ni. Mae’n bosibl y gallwn helpu drwy wneud addasiadau.

• Pwy sy’n atgyweirio’r lifftiau?

  Contractwyr arbenigol. Os bydd y lifft yn stopio gweithio, dywedwch wrthym er mwyn i ni allu trefnu ei bod yn cael ei hatgyweirio’n sydyn.

Gerddi, lleoedd parcio a mannau awyr agored

• Pwy sy’n gofalu am y gerddi?

  Mae ein tîm cynnal a chadw tir yn sicrhau bod ardaloedd awyr agored a rennir yn cael eu cadw’n daclus, yn rhan o’ch tâl gwasanaeth.

• A allaf blannu blodau fy hun?

  Dylech ofyn i ni’n gyntaf – rydym am sicrhau bod popeth yn aros yn saff ac yn gyson.

• Pwy all ddefnyddio’r lleoedd parcio i ymwelwyr?

  Ar gyfer ymweliadau byr yn unig y mae’r lleoedd parcio i ymwelwyr. Dylai’r preswylwyr ddefnyddio eu lle parcio eu hunain os oes ganddynt un.

Taliadau gwasanaeth

• Am beth y mae fy nhaliadau gwasanaeth yn talu?

  Pethau fel gwasanaeth glanhau yn yr ardaloedd cyffredin, trydan ar gyfer goleuadau a rennir, gwaith cynnal a chadw yn y gerddi, gwasanaeth i lifftiau, ac archwiliadau diogelwch tân.

• Pam y mae fy nhâl wedi newid eleni?

  Gall costau gynyddu neu ostwng, yn dibynnu ar bethau fel prisiau contractwyr a biliau cyfleustodau.

Byw’n dda gyda’n gilydd

• Beth os oes rhywun yn camddefnyddio ardaloedd a rennir?

  Os byddwch yn sylwi ar ddifrod, annibendod neu ymddygiad gwrthgymdeithasol, rhowch wybod i ni amdano. Rydym am i bawb deimlo’n saff ac yn gysurus.

• A all pobl ysmygu neu fepio yma?

  Na allant, ddim mewn unrhyw ardaloedd a rennir dan do nac yn union y tu allan i fynedfeydd.

• Pwy sy’n penderfynu sut y caiff mannau a rennir eu defnyddio?

  Rydym yn ystyried adborth preswylwyr, rheolau diogelwch ac anghenion ymarferol. Rydym bob amser yn falch o gael awgrymiadau gennych.

Biniau ac ailgylchu

• Ble y dylwn i roi fy sbwriel?

  Defnyddiwch y biniau sydd yn eich storfa finiau gyffredin. Os nad yw’r labeli yn glir, rhowch wybod i ni.

• Beth am achosion o dipio sbwriel yn anghyfreithlon?

  Rhowch wybod i ni fel y gallwn ymdrin ag achosion o’r fath yn sydyn.

Manylebau glanhau

Isod, fe welwch y manylebau glanhau ar gyfer y math o gartref yr ydych chi’n byw ynddo. Mae’r fanyleb gyntaf ar gyfer cartrefi a fflatiau cyffredinol sydd â mannau cyffredin, ac mae’r ail un ar gyfer mannau a rennir mewn cynlluniau Byw’n Annibynnol. Mae amlder pob tasg a restrir yn y fanyleb wedi’i bennu er mwyn sicrhau bod pob man yn cael gofal a gwasanaeth cynnal a chadw yn gyson. 

Manylebau glanhau ar gyfer ardaloedd cyffredin

Manylebau glanhau ar gyfer cynlluniau Byw’n Annibynnol / Tai Gwarchod

Mae’r manylion wedi’u rhoi yma er mwyn rhoi eglurder i chi a rhoi hyder i chi yn y gwasanaeth yr ydym yn ei ddarparu – ac os oes gennych unrhyw gwestiynau, mae croeso i chi anfon neges atom. Rydym bob amser yn barod i helpu!